【汝那會 雄雄 袂記得喘氣？】
敢是
眠夢著
故鄉 ê 形影？
夢著汝穿著白衫
戴著草笠仔
佇舊厝後壁彼例山
對樹林 ê 空縫
一步 一步
勻勻仔行
勻勻仔行
一步 一步
蹽溪過嶺
蹽溪過嶺
汝敢是袂記得喘氣？
敢是
佇夢中 微微仔笑
笑甲 袂記得 喘氣
笑甲 袂記得
喘氣
笑甲
袂記得
喘
氣
2025/05/18 13:54
2025年5月18日 星期日
2025年5月13日 星期二
【蓮花】
【蓮花】
拗 蓮花
有時 有影是一種 真好 ê 敨 氣
毋知欲講啥時
就恬恬仔
沓沓仔 拗
一蕊 一蕊 一葉 一葉
拗 蓮花
有時 有影是一種 真好 ê 敨 氣
毋知欲講啥時
就恬恬仔
沓沓仔 拗
一蕊 一蕊 一葉 一葉
人， 過去 就是 過去矣
縱有閣較濟 毋願 毋甘
嘛只好 放下
安慰 ê 話
我頇慢講
干焦會當替汝拗一蕊紙蓮花
縱有閣較濟 毋願 毋甘
嘛只好 放下
安慰 ê 話
我頇慢講
干焦會當替汝拗一蕊紙蓮花
佇這个堅凍 ê moment.
2025/05/13 16:22
2025/05/13 16:22
2024年9月9日 星期一
【水懺】
【水懺】
你就 tit-beh 化做烌矣
毋過 你佇我 ê 記持中，袂變。
汝 ê 鋪文 成做訃聞
你就 tit-beh 化做烌矣
毋過 你佇我 ê 記持中，袂變。
你永遠是遐爾仔青春、活跳
像 一尾魚。
佇 生 kah 死 ê 瞬間
汝敢捌躊躇？
佇溪崁 kah 石縫之間
汝敢是 看著一尾
汝想欲確定 ê 魚？
所以你 追逐
所以你 失足
所以你 失足
終其尾，
汝 ê 鋪文 成做訃聞
汝 ê 血瀾 kah 骨肉
成做溪谷 ê 應聲
成做阮 tshām-tshām ê 目屎
滾 絞 思念
——悼一枚熱情燒燙 ê 靈魂 2024/09/09
2024年7月15日 星期一
【自由】
【自由】
自由，
Siánn 是自由？
汝講，
這支筆是我--ê
我欲提來寫 抑毋
我欲提來寫 抑毋
這是我 ê 自由
「 我 是 自 由 - - ê 」
無錯，
無錯，
這支筆 是汝--ê
欲寫、毋寫、攏在汝
毋過，
毋過，
汝這支筆 是 Made in China--ê
汝連想欲提一支 Made in Taiwan ê 筆來寫
汝連想欲提一支 Made in Taiwan ê 筆來寫
ê 自由
都 無。
2024/07/15
2024/07/15
2024年3月10日 星期日
公開反對交通部、行政院「交通微罪不記點、不開放檢舉」修法
舊曆年期間人權律師陳俊翰不幸過身，民進黨立委 kah 身障團體三月初開記者會呼籲行政院 ài 趕緊將《#身心障礙者權益保障法》ê 政院版草案送去立法院審議，內容 ài 落實身心障礙者權利公約（CRPD）ê 精神。
毋過，行政院院會7日針對10項罰款佇千二箍台票以下 ê 交通微罪項目按算未來無記點嘛無欲予民眾檢舉，其中包括違規占用公車專用區 kah 身障車位，無疑是大大犧牲行動不便者 ê 權益，毋但是路權退步，更加是人權 ê 倒退攄！
首先，台灣目前大部分違規停車 ê 罰款才台票 $900 箍已經傷過低，對一般駕駛來講實在無夠痛（¬_¬看向某中國黨徐姓立委）；再者，將佇身障車格、公車專用格違規停車當作「微罪」本身就是有問題 ê 規則。
若參考美國加州舊金山市 ê 規定，佇磅空、橋樑、超過路緣18 英吋、逆向等違規停車 ài 罰款 $82 箍美金；佇路口、斑馬線消防局15英呎內、車道、人行道、併排、消防栓等位違規停車罰款 $108 箍美金，比較起來，若無身障標示牌仔抑是車牌佇藍色區域(Blue Zone)停車 ài 罰款 $444 箍美金（2023上新規定）是加較嚴重，甚至就算是有身障牌仔/車牌，去阻礙著藍色區域（邊線）、輪椅通道、抑是佇藍色區域四箍輾轉槽化線停車攏是違法，仝款 ài 罰 $444 箍美金，若是停車去擋著 3 英尺輪椅坡道，ài 罰 $298 箍美金，以上若是累犯閣 ài 加倍處罰。
另外，若佇公車區(Bus Zone)停車 ài 罰 $380 箍美金，公車專用區若去予其他車輛占用，致使公車無法度倚路邊停車，若有行動無方便、坐輪椅抑是捒囡仔車就真僫上落車，造成乘客不便 kah 安全風險。
以上違規停車事項佇美國毋但有罰款，攏會扣點，累犯會去 hőng 當作風險較懸 ê 駕駛，會去影響著車輛保險 ê 費率。
顛倒是中(華民)國🇹🇼交通部普遍認為上夭壽 ê「超速」，佇美國大部分 ê 州（包括加州）初犯處罰 $100 箍美金，甚至有上輕才罰 $5 箍美金 ê 州，大部分違規停車 ê 罰款，比超速加較懸。
（補充說明：超速 ê 處罰猶另外有其他 ê 附加費，加加起來可能是原底罰款 ê 幾若倍，而且車輛保險費可能會增加 40%甚至到一倍以上）
而且，（雖然我嘛無蓋認同）現此時中(華民)國🇹🇼交通部已經有函示遮--ê 有開放予民眾檢舉違規停車 ê 項目，有 ài 滿三分鐘 ê 規定，若是計程車只是暫時停車欲予人客上落車，應該已經冗冗矣（而且欲刁工踮原地等滿三分鐘 ê「檢舉達人」是無遐濟），若是一般民眾因為欲予車頂行動不便 ê 乘客上落車去 hőng 檢舉，嘛會當去申訴；貨運真正就需要增加 Loading Zone，若無，大台車擋咧路口影響行車視線、路線是閣較危險。
最後，若是完全取消民眾檢舉，最後嘛只是變民眾攏去敲 110 檢舉、空添警察 ê 勤務爾，對違停問題改善是全無作用。
當然，違停問題欲改善一方面雖然是 ài 靠處罰，閣較重要 ê 是提駕照 ê 資格 ài 加嚴、淘汰無適任駕駛（駕照分級、定期回訓攏是手段），路口、標線 ê 改良，甚至是 ài 佇都市計畫內底做好道路 kah 建築物（退縮/行人空間） ê 規畫，才會當整體提升所有用路人 ê 安全。
2023年11月11日 星期六
高鐵延伸宜蘭、特定區 ê 開發到底利益著啥人？
根據新聞報導
宜蘭縣政府證實已經研議擴大高鐵特定區範圍至400 公頃 ê 草案
包含住宅區、商業區、健康休閒產業專區等
按算年底欲送鐵道局審查
博萮身為宜蘭縣民 kap 縣政特區 ê 居民
再次嚴正反對高鐵延伸宜蘭 kah 高鐵特區開發案
高鐵延伸宜蘭除了沿線本身對環境、生態、棲地 ê 破壞
未來對宜蘭社會性、經濟性、文化性 ê 衝擊攏非常重大
但是咧選址、核定過程中嚴重欠缺公眾諮詢
只有政客、民意代表咧冤炒
閣較免講並無正當性、迫切性、必要性、無可替代性
而且，
「起高鐵」這个手段 kah 想欲處理 ê「問題」（ex. 「改善」雪山磅空窒車）之間
嘛毋是（對環境、利害關係人）侵害上細、上有效 ê 做法
手段 kah 目標之間 ê 關聯性傷過薄
高鐵特定區預定 ê 區域本身就是湳地
是落大雨就會淹水 ê 所在
表示嘛負擔滯洪 ê 重要功能
紲落來遮 ê 水田若去 hőng 徵收就必然受著破壞
毋但是農地農用、農地零流失 ê 原則閣再次 ài 犧牲
種作面積減少、耕地環境、水圳加速劣化、破碎化
更加是危害糧食安全
閣有倚靠水田生活 ê 各種生物
棲地嘛會受著無可恢復 ê 破壞
特定區擴大開發草案雖罔縣政府表示已經評估必要性、合理性 kah 財務計畫
毋過攏是紙頂作業
若毋捌做公共溝通
是袂勘得社會檢視--ê
結果縣府竟然表示欲等鐵道局核定計畫
才欲參鄉親說明、溝通
根本是反民主
閣較免講這牽涉著幾偌百戶民宅可能面臨迫遷
若到時民眾無願意接受
敢毋是浪費時間 kah 資源？
干焦高鐵建設預算就咧欲兩千億
猶未將土地徵收算--入去
完全就是一項「錢坑建設」
未來必定是「債留囝孫」
違背世代正義
進前參加高鐵環評 ê 範疇界定
知影主管機關刁工將高鐵建設 kah 特定區 ê 環評拆開
這會造成兩項大規模開發對環境加乘影響就會真僫被確實探討
除了高鐵、特定區會永久改變宜蘭 ê 地景地貌
對邊仔 ê 社區（包括縣政特區）ê 影響嘛是痟大
會來蹛佇這个區域 ê 人（包括我本人）
我相信攏是較注重生活品質 ê 人
若是佇遮倚 ê 所在欲徛做大量 ê 商業利用
居住水準絕對是會嚴重減損
但是縣府完全無替遮 ê 居民設想
清彩就出賣縣政特區住民 ê 權益
縣府講「核定以後」才欲來溝通
攏定案矣按呢是啥貨溝通？！
只是逼咱接受既定 ê 結果爾爾
高鐵延伸宜蘭、特定區 ê 開發到底利益著啥人？
除了炒地皮 kah 營造業以外
我實在是想無到底 siáng 會受益
#土地正義 #環境正義 #世代正義
2022年10月6日 星期四
做陣共宜蘭 ê 黨外精神揣倒轉來！
咱宜蘭這幾冬政壇事風風雨雨，尤其是自2018年選舉了後，就開始一直予外界訕笑，是按怎會選出這款只會曉逐工走攤 ê 縣長？宜蘭人敢有遮痟貪？候選人喝講「囡仔讀冊食飯免錢」就予人牽去？
閣較免講到今縣長因為涉貪去予檢察官起訴，宜蘭人過去引以為傲 ê 民主聖地竟然淪落至此，這款見笑代咱宜蘭人那會堪得吞忍？
2022年6月9日 星期四
2022年4月28日 星期四
因為宜蘭，我拍拚成做值得恁託付 ê 人 4.0
是戰後《舊金山和約》生效 ê 日子
是紀念台灣、澎湖脫離日本統治、主權自由 ê 日子
是閣一个感嘆台灣人猶無國家 ê 日子
嘛是博萮宣布參選宜蘭縣議員 ê 日子
這擺，
是博萮六冬來第四擺參選
後壁這三擺
博萮攏選佇 4 月 28 這工正式宣布
因為「台澎主權自由日」對咱台灣人 ê 意義非凡
