咱宜蘭這幾冬政壇事風風雨雨，尤其是自2018年選舉了後，就開始一直予外界訕笑，是按怎會選出這款只會曉逐工走攤 ê 縣長？宜蘭人敢有遮痟貪？候選人喝講「囡仔讀冊食飯免錢」就予人牽去？
閣較免講到今縣長因為涉貪去予檢察官起訴，宜蘭人過去引以為傲 ê 民主聖地竟然淪落至此，這款見笑代咱宜蘭人那會堪得吞忍？
博萮知影，原本 ê 執政黨嘛是予人足失望，尤其是 in 捒出來 ê 候選人嘛予人投袂落去，兩爿攏無想欲支持嘛造成誠濟鄉親毋願出來投票，這款鬱卒博萮感同身受。
嘛因為按呢，毋管紲落來啥人做縣長，咱 ê 縣政攏需要強力監督，毋通予任何一黨傷靠勢！
咱宜蘭過去「環保立縣」、「文化立縣」、「觀光立縣」ê 核心基礎，由博萮來捍衛，宜蘭 ê 好山好水袂得變做政客炒地皮 ê 好所在，咱後一代 ê 未來，請支持博萮來拍拚守護！
咱宜蘭人毋通失志，咱愛團結一致，將過去宜蘭人 ê 黨外精神揣倒轉來，共同守護咱宜蘭人 ê 尊嚴、重現民主聖地 ê 光榮，為未來台灣建國拍好基礎！
博萮上主要關心 ê 議題包括生態、環保、綠能、文資、食農、遊憩、母語、體育、TOD、人本交通、台灣建國等等。
具體目標是農地、濕地、淺山區域淨零流失，加強食農教育、為營養午餐把關，推動綠能自主、加速地熱能開發，監督落實國土計畫法、遏止浮濫開發，強力監督縣內公共工程環評佮生態檢核，爭取臨時教師、警消、勞工、弱勢權益，推動道路平權、人本交通、宜蘭輕軌TOD（反對高鐵延伸宜蘭），重點體育項目選手、隊伍培訓佮資源媒合，加強環境、生命、性平、美學、法普教育，水域遊憩原則開放、有效管理、安全教育，監督加強取締交通、建管違規、環境污染，保存文化資產、重建南島海洋民族史觀，推捒義務教育開設母語專班、全母語學校，路名、地名、校名去中國化、去威權象徵…。
